السلام عليكم ورحمة الله وبركاته

الجزء الثاني من خرابيش .. المقدمة والجزء الأول موجودة هنا في مكان ما .. ما أبغى احط الرابط .. خلوني أشغّل محرك البحث اللي عندي شوي << اللي يسمعه يقول قوقل على غفلة .. نبدأ مع الخرابيش .. وتذكروا .. لا رابط مشترك بينها !

(( 1 ))

وبيدي بيرة !!

مادة (مدخل إلى إدارة الموارد البشرية) درستها وخلصتها .. كان مما فيها .. تقديم بحث .. والبحث يقوم عليه 3 أشخاص في كل مجموعة .. وفي البحث لازم تسوي مقابلة مع احد المختصين .. كان في المجموعة روب << زبادي و ميشيل << يوم تقول اسمها كأنها تقول مشعل !! عاد أنا أتذكر واحد من الشباب الله يستر عليه والثالث هو موتاب .. طبعا طالب كندي .. وطالبة كندية .. ومحدثكم (أعتقد إني سعودي) ميشيل رتبت المقابلة مع (كريس) عضو في أحد اتحادات الشركات .. رحنا للموعد .. دقينا الباب فتحت أمرأة من شرق آسيا .. سلمت علينا بطريقة محترمة جدا !! لدرجة إني توقعت إنها ممكن (تقبّل) يدي !! قلنا لها : كريس موجود ؟! قالت : ايوه تفضلوا .. دخلنا على الترتيب : ميشيل , روب , موتاب .. راحت على طول ورجعت لنا لدرجة إنها ما أمدانا نجلس .. كان معها علبتين دايت كوكاكولا .. أعطتها روب وميشيل .. وراحت للمطبخ مرة ثانية .. جابت معها علبة .. اول ما مدتها لي دخل كريس .. قمنا نسلم عليه .. طبعا أنا ما انتبهت للعلبة وش تكون !! سلم علينا كريس وقال لها : لا .. غلط هذي بيرة !! قالت : عادي .. يمكن هو يبغى بيرة .. طبعا الحوار ذا صاير قدامي وأنا فاتح فمي ومفهي ! (اللي يوصل مرحلة كبيرة في الفهاوة يكون فاتح فمه .. الله لا يبلى قراءنا الأعزاء:D ) قال : لا ما يبغى .. قالت هي : وش رايك ؟! ووجهت الكلام لي !! قلت : هاه << أول ما سمعوا الكلمة ذي غسلوا يديهم مني !! هههههههههههههه :P جاء كريس ومصع العلبة من يدي .. قال لي : وش تشرب ؟! قلت : مويا << باين اللي خاف من كل المشروبات اللي في البيت !! .. طبعا كملنا المقابلة وطلعنا بعد ساعة .. أول ما ركبنا السيارة (ميشيل تسوق وأنا قدام وروب ورا) عل طول ماتوا ضحك !! طلعوا الشباب ماسكين انفسهم طول اللقاء وما صدقوا يلقون فرصة !! والله إحراج !  .. لكن ترا والله م شربت غير مويا عندهم !

(( 2 ))

شخص عزيز عليّ .. قال لي : فقدت المدونة بريقها المعتاد .. والسبب : أنا ! لأن حماسي قلّ .. أعترف أنا جزء كبير من السبب .. لكن هل من متابعين معي ؟! أتمنى أجد رد ولو بدون اسم حتى أعرف من معي !

(( 3 ))

الملحقية طفشوني .. لاطعيني بالتذاكر حقتي !! مدري وش المشكلة !! الله يعين بكره بأصحى بدري عشان اكلمهم !! دعواتكم ترا الرحلة قربت !! والاختبار أقرب !!

(( 4 ))

حرارة شوقي لكم .. كحرارة صيف .. بدون مكيف ! على طاري المكيف (جاك) ابن اللذينا راح وما صلح المكيف ! نسيت اقول لكم جاك هو صاح البيت .. وسافر بدون ما يصلح المكيف !! الحر اللي هنا ما ينطاق .. أحس إني بنقالي بس ناقص (الفوطه + فنيلة علاقي) هذا الحر وحنا هنا .. عاد وشلون السعودية ؟! شكلي بأهوّن عن الإجازة !

(( 5 ))

أحسن اثنين عندي .. بعد النوم والاسكريم .. أحمد ويوسف ! على طاري الاسكريم .. دقيقة أبي اروح اجيب اسكريم واجي .. أحد يبي ؟! (برايفت لـ أناس إذا كان يقرا : أمس جبنا غوار: زياد ومحسن وأنا) هههههههههههههههههه .. لا أحد يسألني عن سبب الضحك لأن أنس يعرف !

(( 6 ))

من الأشياء اللي وحشتني .. البزارين .. خصوصا الأطفال منهم ! عاد أكيد أحد يسأل هل فيه بزارين لكن غير أطفال ؟! أترك الجواب لأذهانكم المتفتقة ! << أما الجلمة الأخيرة قوية ! من جد .. وحشوني الصغار .. وبما إن الحديث عن الوحشه .. أعتقد إن المطاعم كلها ما وحشتني أبدا !! إلا (شيخ البرغر) نوعا ما .. أما البقية ما جبت لها خبر !! يا زين أكل البيت بس ! << يلمّح لأشياء .. الله يا الدنيا .. مين اللي صار يقول الكلام ذا !! أما ماكدونالدز فهذا ما أعتقد أبدا إنه راح يوحشني يوما ما .. أصلا حلفت إني ما آكل منه في السعودية !! مرت فترة صرت أسميه (وما زلت) المطبخ ! من كثر ما آكل فيه !! الحمدلله على النعمه !

(( 7 ))

مُنع لعب كرة القدم في صالة المدينة .. والسبب السعوديين !! فشلونا لكن مو كلهم !! على طاري الكورة .. متحمس ألعب !! هل فيه أحد يحطني بفريقه إذا كانوا ناقصين واحد ؟! تراني كويس في طرد الكور !!

(( 8 ))

سلامات .. ما تشوفون شر .. أقولها لأكثر من واحد .. ويا ليت تطمنوني عنهم !

(( 9 ))

امممممم .. وش باقي وش باقي ؟! << قاعد يفكر ! .. ايوه صح .. فيه سؤال ؟! ليه الأنشكة تتغير بتغير المكان ؟! يعني الأنشطة والرياضات اللي هنا تختلف عن السعودية !! صحيح إنه فيه بعضها بسبب البيئة لكن كثير منها مو شرط ! بيني وبينكم .. ترا ما فيه شيء زين في السعودية !! بالله قولوا لي وش ممكن أسوي في الإجازة إذا جيت إن شاء الله ؟! لا أحد يقول لي : دمج وطريق عمّأن !! صحيح إن مشتاق لطلعة البر لكن مو كل يوم !! هل فيه اقتراحات ؟!

(( 10 ))

مرة كنا قاعدين على شاطئ النهر نطقطق كورة (طبعا الشاطئ مزروع) << بس يبي يوريكم إنها أزين من حقل ! << على طاري حقل .. ترا نفسي أروح لها :( .. المهم نرجع لمحور حديثنا .. كنا نطقطق كورة .. وفيه جنبنا واحد شكله خبل .. لكن طلع سكران (أكرمكم الله) .. شوي إلا جو ثنين عسكر على سياكل .. قالوا للشله اللي قاعدين : وش ذا ؟! وأشروا على بيرة .. قال الخبل : بيرة .. قالوا له : ما تدري إنه ممنوع ؟! قال : ألا .. بس تراها مقفلة .. قالوا له : خذها وحطها بكيس واقلب وجهك .. وكرشوه من الشاطئ .. جوا لخويه لقوه فاتحها .. خلوه ينثرها على الأرض .. ثم صكّوه بمخالفة !! ممنوع الشرب الأماكن العامة ! والله العسكر عندهم شيء ثاني .. ذكروني اقول لكم سالفة بعدين إن شاء الله ..

نشوفكم على خير في خرابيش قادمة بإذن الله ,,

***

قفلة

ووجهٌ كأن الشمس ألقت رداءها .. عليه نقي اللون لم يتخددا !

موتاب

كاملوبس - كندا

صدقوني .. أبي رجل عظيم !