السلام عليكم ورحمة الله وبركاته

توطئة

” عرفت ليه الكفار يسكرون , ويشربون الخمر  والنبيذ “

التوقيع : موتاب.

***

أما كلمة الكفار قوية أقصد هذولا الناس الخربانين .. من جد عرفت ليه يسكرون !! من الضغط اللي يلقونه !! واللي عايش الضغط يعرف السبب .. وإذا عُرف السبب بطل العجب << لا يكثر .. المهم : والله وحشتوني .. من زماااان عنكم أكيد اشتقتوا لي << ما ظنيت وأما من ناحيتي أترك الجواب لنفسي << لا يا شيخ عاد الموضوع اللي اليوم كان من المفترض اكتبه الأسبوع اللي فات لكن قدر الله وما شاء فعل .. والحمدلله على كل حال .. ومن العايدين .. ومن المفارقات العجيبة << الجملة ذي قاريها في مجلة إن الموضوع اللي ناوي اكتب عنه تكلم عنه الأخ أبو ساره - حفظه الله ورعاه وجعله ذخرا لابنائه الطلاب - << خصوصا اللي في ثاني ثانوي أقول تكلم عنه في تعليق سابق له .. ومن هناك كانت الانطلاقة ..

***

بادئة

أجر قدميّ جرا للمحاضرة .. مالي نفس احضر .. ليس لشيء لكن لأني أعرف إنها مجرد تضييع وقت .. وما راح استفيد منها شيء .. غير إنها 3 ساعات مملة وطويلة .. حضرت بدري .. جاء طالب (ما أحبه أبدا) وجليس جنبي .. ومن حظي إن ريحته كانت (تايد للملابس الملونة) تشق الراس شق !! << ومع الحساسيه اللي عندي ما يحتاج اشرح كثير وش صار .. الزبدة إني طلعت من المحاضرة بدري , ما كملت ساعة !! أحد يجي وريحته تايد !!

***

رأس

 قبل الاختبار النهائي .. أعطتنا مدرّسة المادة مجموعة أسئلة وقالت : الجزء الأول فيها 24 سؤال .. في الاختبار راح تلقون منها 15 والمطلوب تحلون 10 .. والجزء الثاني فيها 6 أسئلة راح تلقون 5 أسئلة تحلون منها واحد .. غير الاسئلة الثانية .. عاد موتاب قام يذاكر .. كان عندي أناس ومع السوالف قلت له : كم أحفظ سؤال من الـ24 ؟ قال : احفظها كلها !! قلت : مستحيل يكون حظي زفت وتجيني الأسئلة اللي حافظها !! 15 سؤال كثير .. المهم صرت أمر عليها واحفظ اللي يعجبني واترك اللي مو عاجبني وطلعت بـ 18 سؤال .. ومن الجزء الثاني حفظت سؤال واحد فقط .. دخلت الاختبار .. وأبدا بالقسم الأول .. وأحل السؤال الأول .. والثاني .. والثالث .. وهكذا ولما وصلت السؤال السابع وأنا شغال حل قلت في نفسي : يا شينك يا أناس يوم تتفلسف !! الحين مر عليّ 7 فقط وحليتها كلها باقي 8 أحل منها 3 بس يا حظي .. ومن حشيت في أناس ما عرفت ولا سؤال من الباقي !! ادور يمين يسار يمكن ألقى شيء .. الأسئلة الباقية ما أعرفها !! وبطلعة الروح حليت بعضها (وألفت قليل منها) وخلصنا بعد ضغط رهيب .. قلبت الصفحة للجزء الثاني .. وألقى 5 أسئلة .. أدور السؤال اللي أنا حافظة ما حصلته !! طلع هو الوحيد المحذوف !! أما يا هو حظ !! رفعت يدي وناديت المدرّسة .. جتني .. قلت لها : بس هذي الأسئلة ؟ قالت : إيوه .. جاوب بس سؤال واحد .. قلت لها : بس فيه سؤال موضوعه هيك وهيك .. وبصراحة هو الوحيد اللي حافظه << قوي وجه :D قالت : So funny لو كنت مكانك راح أجاوب على السؤال ذا .. وقعدت تشرح لي .. عرفت ليش اختارت السؤال ذا بالذات .. لأن التأليف فيه سهل .. حينها ألفت بما فتح الله عليّ .. وطلعت من الاختبار وأناس في بالي !!

***

نهاية

طلعت من الاختبار وأناس في بالي .. تقابلنا في الليل أنا وأناس وزياد .. جينا نبي نشتري (فشار) كان فيه صفين كل واحد عنده مكينه وبياعه .. الصفوف متساوية لذلك ما تفرق وصفينا في واحد منها .. وفي هذه الأثناء في انتظار الدور .. شفت البياعه اللي واقفين عندها قاعده (تعبث بأنفها) شيء مقرررررف صديت عشان أسوي نفسي ما شفت وقلت : خلني أروح الصف الثاني .. لقيت خوينا يضحك وشايف الموقف .. صفينا .. ووصلنا الدور .. ولما طلبنا كانت الأولى فاضية .. فـ حبّت تساعد خويتها .. وهي اللي جت وسوت لنا الفشار !! يعععععععععععععععععع !! هربنا منها ولحقتنا !! (بيني وبينكم الفشار فيه طعم حموضه شوي) مدري ليه كل ما أتذكر السالفة هذي يجي واحد في بالي .. هههههههههههههههه أتوقع يعرف نفسه

***

في الطرف الآخر

من جهة أخرى .. يمكن البعض منكم يذكر الموضوع : يحفظهم الرحمن .. والبعض يذكر إني كنت مسافر وتوني رجعت أمس .. الحمدلله على سلامتي .. كنت في فانكوفر .. وصلت البيت في منتصف العصر .. الغريب إني ما لقيت باب البيت فاتح كالعادة .. لقيته فاتح أكثر من العادة !! يعني أول كان يكون مقفل لكن مو بالمفتاح .. لكن المره هذي لقيته مفتوح بمقدار 5 سم تقريبا .. يعني مردود رد !! لا أحد يقول لي : أهبل واترك البيت فاتح .. لكن ترا رجعت للبيت مرتين .. ومتأكد إنه مقفل !! الحمدلله إني ما فقدت شيء .. كل شيء على ما تركته !! ما أدري وش الحل بالموضوع ذا ؟! الحمدلله على كل حال !

***

قفلة

لا حول ولا قوّة إلا بالله

موتاب

كاملوبس - كندا

صدقوني .. أبي رجل عظيم !