السلام عليكم ورحمة الله وبركاته

هلا وسهلا فيكم مجددا مع حلقة من حلقات برنامجكم مضارب البادية << سماجه الفجر << بيوريكم إنه قاعد يكتب الفجر

أما تخيوا إني أقدم مضارب البادية ؟! وأسوي نفسي شاعر وصح لسانك ومن اللزي منّوه ;) هههههههههه ما هي راكبه

أصلا من اليوم قاعد أفكر .. هل هي (غير مأسوفا عليه) أو (غير مأسوفٍ عليه) ؟! << وينك يا اللي في بالي تجي تتفلسف  تورطت .. ومع قوقل طلعت معي كذا !! ضيعنا العربي والانجليزي وصرنا بلغة جديدة أقرب (للخرابيط) منها للغة << لا يكثر وهات من الآخر ..

يوم الثلاثاء الماضي .. قررت أعطي نفسي إجازة ذاك اليوم .. أصلا ما عندي غير محاضرة وحده بعد العشاء .. ويوم الثلاثاء بالذات ما فيه شيء تدرسه تقول : يا حللاه يا الكلاس << ما أدري كيف طلعت مني !! مشوها .. لكن لازم استفيد من اليوم ذا .. خصوصا إني ما مريت العجيَز Mel ( مِـل )اللي كنت ساكن عندها بالصيف من رجعت .. وحتى الهدية اللي موصيتني أمي أوديها لها ما وديتها .. برايفت لأمي : ما لقيت وقت مناسب .. دقيت عليها مرتين وما ترد وفي كل مرة أترك لها رسالة .. وانشغلت بالدراسة سوري ماما .. << توّك تقول مضارب البادية والحين سوري !! يوم الأثنين اتصلت على العجيز وأخذت أخبارها وحجزت موعد معها عشان أزروها << صارت مستشفى مو بيت لكن هذا نظام الشعب هنا ..

الثلاثاء .. لبست واتصلت على تاكسي عشان يجيني .. (التاكسي لازم تتصل على الشركة يرسلون لك واحد .. شغل إنك توقف بالشارع وتأشر ما ينفع هنا) .. اتصلت على تاكسي لسببن .. الأول : إني ما أبي أتأخر على الموعد .. الثاني : أعتقد تذكرون وش فيه عند جارهم وما أبغى أعيد الذكريات .. وصلت البيت ولقيتها تنتظرني .. سلمت عليها ودخلت .. ولعت لي شمعة على الطاولة وأعطيتها هدية أمي .. قلت : الوالدة تسلم عليتس وعطتني هذي تقول عطه Mel  .. يبدو لي إن العجوز عندها خبرة من ناحية الثقافات !! لأنه كثقافة أمريكا الشمالية (كندا وأمريكا) إذا أعطيت أحد هدية .. يفتحها قدامك ويبدي إعجابه فيها .. وإذا كانت ملابس يقيسها أو ساعة يلبسها يعني يجربها باختصار .. لكن العجوز أتوقع إنها عرفت من كثر ما تتعامل مع الطلاب .. (لها أكثر من 25 سنة) أعطيتها الهدية .. أخذتها وحطتها على جنب طبعا بعد ما شكرتني .. على طاري 25 سنة !! أول طالب سكن عندها في البيت كوري .. جلس يمكن 3 سنوات .. زارها قبل فترة متزوج ومعاه عياله وصار عمره بالأربعينات !!

المهم .. سوت لي شاهي وسوالف مع العجوز .. تسألني كيف الدراسة .. وكيف الأمور .. وين ساكن ومع مين .. وكيف الحاره .. عسى مرتاح .. عاد أنا سألتها .. كيف الحال ؟! << أول سؤال في أي محادثة عربية .. أول شيء قالته لي : تذكر جارنا اللي عنده كلب ؟! ما قلنا ما نبي نعيد الذكريات قلت لها : إيوه .. وش فيه ؟! قالت : أبشرك رحل !! عاد انا بغيت أقلبها تفحيط في البيت .. دمعتي بعيني من الفرحه << وشلون لو قلنا لك مبروك التخرج ؟! .. قالت : رحلوا قبل فترة .. آخر شهر قبل ما يمشون طفشنا الكلب حقهم !! ينابح طول الليل والنهار .. إزعاج قمة الإزعاج .. أنا في نفسي أقول : ما هججني إلا هو ابن الكلب !! والحاره مبسوطين إنهم افتكوا منه يا حليل العجوز حاسه بمعاناتي والله أيام .. صارت ذكريات !

سألتها أنا .. قلت لها : وشلون الإجازة وسفرتك ؟! عاد الظاهر ما صدقت !! وتستلمني هذيك الاستلامه اللي يحبها قلبك .. قالت : عندي صور لكن ما حطيتها في ألبوم لسا لكن بأوريك بعضها .. وتاخذ مجموعة صور .. نصها ما توريني إياه .. (صور الشجرة اللي عند بيتها لما قصتها الحكومة ) وقاعدة تسولف عن كل صورة .. مدري ليه اللي يسافر يحب يسولف إذا رجع << هذا تمهيد لأني إذا رجعت بالسلامة إن شاء الله راح أغثكم سوالف .. لكن في المقابل اللي قدامك يطفش << لكن برضه لازم تسمعون لي .. رحمت المسكينة .. لأنها تقريبا لحالها .. حست هي إن الجو بارد .. وتقوم وتشب الحطب !! حركات هـ العجوز .. مشب ونار وشغل بدو كنت أتوقع إني ما راح أطول عندها .. لكن جلست أكثر من ساعة .. أغلبها على رحلتها !! وش رايكم أقول لكم قصة الرحلة حقتها ؟! طلعوا من نيويورك بالباخرة  .. ومروا كذا مدينة في كندا .. وبس هذي الرحلة مختصرة ومفيدة لكن الباخرة من جوا رهيبة جدا جدا وفخمة .. فيها كل شيء !! مطعم .. سوق .. مسبح .. مضمار جري !! مدينة صغيرة سعتها 2000-3000 شخص !! عاد العجوز تقول لي : السنة الجايه بأروح ألاسكا !! ما هي صاحيه !! ألاسكا بهالبرد !! لهم موسم للرحلات إلى ألاسكا 3 شهور في السنة .. باقي السنة يكون الطريق متجمد !! هاه أحد له نية يخاويها ؟!

طلعت من عندها .. وودعتها .. عزمتني على حفلة الكرسمس .. تقول : إذا كنت موجود تعال .. أحسن من ما تجلس لحالك .. شكرتها على حسن الضيافة .. وشكرتني على الزيارة .. وقلنا : مع السلامة ..

***

قفلة

أقرب الناس أنت .. يا نظر عيني !

وأبعد الناس أنت .. وأنت في عيني !

موتاب

كندا

صدقوني .. أبي رجل عظيم !