السلام عليكم ورحمة الله وبركاته

ما لي نفس أكتب .. حاولت تأخير الكتابة لآخر وقت ممكن .. لكن ما فيه أكثر من كذا تأخير .. لازم أكتب لكم .. لأنكم الوحيدين اللي أشعر بتواصلهم معي ! كثير تركوني .. وانقطع تواصلهم معي .. ولا صاروا يسألون عني .. واللي ما سأل عني ما راح أسأل عنه .. الغريب إني لما رجعت للسعودية قابلت الكثير .. وكلهم كان يظهر الحب والاحترام والشوق لي .. ومن سافرت هذاك علمي فيه !! هل يتوقع أحدهم إني راح اتصل عليه ؟! ما أعتقد .. لأنه لو كنت متصلا لاتصلت على أبوي وأمي فقط .. والبقية اللي يبيني يتصل علي .. عذرا للجميع .. لكن تختلف الظروف من شخص لآخر .. ومن رأيي أنني أنا صاحب الحق في التواصل .. وجهة نظري ! لا أحد يحسبني اقول الكلام ذا (أتمسكن) أو عشان أظهر قدامكم (أكسر الخاطر) أو حتى عشان ترحموني وتنهال علي الاتصالات !! بالعكس تماما .. هو مجرد توضيح لا أكثر لـ(بعضهم) حتى (….) كلام ومسحته !

***

نجي للمفيد .. خاطرة اليوم ..

صورة من أحد نشاطات الجامعة .. يظهر فيها أبو فيصل أحد المفربين مني (يمين) .. موتاب (يسار)  .. وخلفي مخلوقات من مكان آخر من العالم .. تم طمس معالمها عشان أبو فارس

ما أدري والله .. هل هي ميزة بي .. أو عيب ؟! ومثل ما قلت فوق .. أنتم فقط اللي معي .. راح أخذ رايكم فيه .. ويا ليت اللي عنده رأي يقوله .. فـ منكم نستفيد ..

مشاكل السعوديين .. وخرابيطهم .. وسوالفهم .. آخر من يعلم عنها هو أنا !

تصير مشكلة .. طويلة عريضة .. وأنا عايش في نفس المكان .. ما ادري عنها غير بعد فترة .. وحتى ما أعرفها كاملة .. أعرف إنه (واحد) بدون اسم .. صار له كذا وكذا .. والسبب هيك وهيك .. بعد شهر من وقوع الحادثة !

يعني يجي مسؤولين من الملحقية للمدينة عشان يحلون مشكلة طالب مع الشرطة ويسافرون .. وخويكم (اللي هو أنا) ما يدري غير بعد شهر !

قبل كم يوم .. أسولف مع واحد من الشباب .. ذكر لي موضوع .. قلت له : ما أدري .. قال : شكلك عارف .. قلت : والله ما عندي خبر .. جلس يضحك ويقول : من زمان صاير الكلام ذا وتوقعت إنك داري .. طبعا كان يتحدث عن (خرابيط) سعوديين .. ما أخذت السالفة كاملة .. ولا أخذت تفاصيل ولا حتى أشخاص .. تركتها كما هي .. لأنه ما يهمني الموضوع !

السوالف على كذا واااجد .. وكثيرة جدا .. وهذي مجرد أمثلة ..

هل هذي ميزة أو عيب ؟! بالنسبة لي : أعتبرها بنسبة 90% ميزة .. لأني ماني ناقص وجع رأس وخرابيط (بزران) وماني مسؤول عن أحد .. لكن أحيانا يجيني تأنيب ضمير بأني لازم اعرف وش اللي يصير حولي لأنه ممكن يأثر علي أو على سمعة السعوديين كلها .. أو على الأقل تواصلا مع المجتمع اللي أنا فيه !!

هل أحد عنده رأي في الموضوع ؟!

(تلوح في الأفق معالم شيء قادم .. الله يستر من بعض “تصرفاتهم”)

***

قفلة

قل “للرّخوم” اللي تمنى مطيحي *** بدري عليكم “شعرة” من راسي تمسّون

موتاب

كندا

صدقوني .. أبي رجل عظيم !