السلام عليكم ورحمة الله وبركاته ..

حي الله القارئين والقارئات .. معليش على التأخير لأني أمس كله كنت برا البيت .. طلعت مع شباب لـ (بحيرة) نشوي ونلعب ونستانس .. ورجعت تعبان ما فيني حيل أسولف عليكم .. فـ معليش !

وبالنسبة للأسبوع الجاي إن شاء الله .. برضه راح أتأخر في الكتابة لأني بأطلع مخيم لمدة 3 أيام من الجمعة وحتى الأحد .. وراح أحاول أكتب مبكرا قدر المستطاع ..

غير كذا .. أحب أقول للجميع .. إن جوازي وصل من السفارة الكندية في أمريكا .. مع فيزا .. يعني خلاص أقدر أرجع السعودية إن شاء الله .. ما أدري متى بالضبط لكن تقريبا بعد شهر من الآن .. فألف مبروك ..

السالفة ذي ذا مثل ما قلت في أحد التعليقات سابقا ما كنت ناوي أكتبها .. كنت ناوي أكتب تعيق على خبر قريته في إحدى الصحف .. لكن فيه تعليق خلاني أغير كلامي .. وأهدي السالفة ذي لـ (سعود وإخوانه) المحدودة << بداية السماجات :D

نجي لسالفة اليوم : نشاط مع الجامعة لزيارة عرض رعاة البقر ..

مثل ما يعرف البعض منكم .. إني طالب نجيب .. ومعنى طالب نجيب إنك تشارك في النشاطات اللي تسويها الجامعة  .. طبعا أنا أشارك فيها قدر المستطاع لأكثر من سبب .. أول شيء النشاطات اللي يقدمونها حلوة بصراحة .. غير إنها تكون في نهاية الأسبوع واللي غالبا يكون طفش إذا ما كان عندك شيء تسويه .. الشيء الثالث إنهم يجيبون عروض أرخص .. يعني لو بغيت تطلع لحالك ممكن تدفع أكثر ..

نشاط الأسبوع كان إننا نروح لقرية ريفية ..نتفرج على مسابقة لـ (رعاة البقر) .. تحدد الموعد يوم السبت .. صحيت من النوم .. تروشت وأفطرت وتجهزت وطلعت .. وأنا أمشي رايح لموقف الباص .. شفت الباص روّح من قدامي !! يعني راح علي .. قلت أمشي خطوتين زيادة وأروح للباص الثاني .. لكن للأسف قبل ما أكمل الخطوتين راح الباص من قدامي .. يعني راح علي .. طالعت في الساعة : باقي ربع ساعة عن الموعد .. اتصلت على واحد من الزملاء هنا .. طبعا اقول له : شف لي جدول الباصات .. هل فيه باص بيمر من عندي ولا لا ؟! ياخي راح علي باصين وأنا واقف .. وما بقى وقت ! ومن هالكلام .. الفكرة الأساسية إني أخليه يقول : خلاص أنا أمرك .. لأن معه سيارة .. لكنه كان نص نايم وما فهم علي .. ومعذور ..

قفلت السماعة .. وطالعت الحل إما أجلس على أمل يجيني باص ويمكن ما يجي ولازم أروح مشي .. شغلت مخي حينها وقلت : يا ولد ما بدهاش اكسب الوقت وانلطق من الحين !

وأيمم وجهي شطر الجامعة وأركض .. المشكلة لما تركض في جزمه (تكرمون) مدري وش تبي ! والمشكلة الأكبر لما تركض وأنت لابس جينز !!

لكن كل هذا يهون مقابل إني اركض وأنا ماني لابس حزام !! مو عشان شيء لكن لو ألبس حزام يلف علي 7 مرات ونص ! والبنطلون كان كويس قبل ما اركض .. فصارت حالتي صعبة شوي .. كملت المشوار ركضا .. ولما شفت الجامعة عرفت إني راح أوصل على الوقت .. فكملت الباقي مشي .. ولما وصلت مواقف الجامعة وصل الباص معي !! يعني لو ما تفلسفت وشغلت مخي كان يمديني راكب معه ومرتاح .. لكن (شغلت مخي)

المشوار من البيت للجامعة على ذمة قوقل إنه 2.8 كيلو متر .. يعني بالنسبة لي انجاز .. المهم وصلت الجامعة .. قابلت المشرفين على النشاط (والمشرفات) وركبت الباص ارتاح .. جتني (كيري) << كيري ولاّ كرافت اسمها كيري بفتح الكاف وسكون الياء المهملة << كنت أقراها ببعض الكتب ومدري وش معناها .. قالت لي : شكلك تعبان !! قلت : لا ولا شيء وقابلت واحد من الشباب قال لي : كيف جيت ؟ قلت : جري .. قال : على رجولك ؟! لا على براطمي !!! بالله هذا سؤال !!

حرّكنا .. وفي الطريق نمر على أماكن قديمة .. وقاعدين يعطونا درس في التاريخ .. وهنا كان قدماء الإنجليز مدري وش يسوون عشان المويا لأن المنطقة ناشفة .. ومن الكلام اللي يوجع الراس !! ذكروني لما رحنا مع وزارة التربية والتعليم لـ (مصر) .. يعطونك دروس في التاريخ .. كله كوم والكلام عن (معركة تبة الشقرة) كوم ثاني .. وكيف المصريين ضحكوا على إسرائيل وكسروا خشومهم !! يعني للي مو مهتم بالتاريخ شوي ممل << بس شوي

وقفنا نتصور على بحيرة .. فكانت هذي الصورة :

موتاب يمين الصورة وبجواره (أوساما) الشقيق الأكبر لـ (أناس) يسار الصورة ..

وكملنا الطريق .. في البداية مرينا على مدينة كان فيها عرض لسيارات قديمة .. ونشاط بسيط .. يعني شيء حلو .. ثم كملنا للعرض الرئيسي ..

جلسنا مع الجمهور .. على كراسي خشب << ركزوا على هذي لأنها راح تمر علينا بعدين  .. ونتفرج .. أول شيء بدا العرض بالسلام الملكي الأمريكي << على وزن السلام الملكي السعودي وبعد الأمريكي الكندي .. وبصراحة استغربت ليه ؟! ولا أعرف الجواب !

العروض حلوة .. والمسابقات متنوعة .. اخترت لكم كم صورة منها ..

 

 

أنا وصاحبيّ قررنا ناكل .. رحنا نبي نشتري .. ومتعودين كلنا إننا نحاسب بالبطاقة .. وما ندفع كاش .. طلعت كل المحلات اللي هناك ريفية أصلا .. وما فيها الخدمة ذي .. ولازم ندفع كاش فقط .. فتشت لقيت معي 20 دولار حاطها للأشياء هذي .. واشترينا فيها وكفتنا ولله الحمد .. المشكلة إن البرغر  كان فيه بصل  .. والظاهر كان العكس بصل فيه برغر !! طبعا اضطريت آكله ..  لأنه الفلوس خلصت و(الجوع كافر) .. والحمد لله على النعمة ..

<< الله يا الدنيا .. مين كان يصدق إنك تسويها ؟!

لما كنا نشوف في التلفزيون أول .. نحسب الخيل أو الثور مو مروّض .. لكن لما شفناها على الحقيقة .. ترا يضربونها ضرب .. غير إنهم يربطون عليها حزام يضايقها كثير .. ولما يطيح الخيّال يجي واحد ويفك الحزام .. وتلقى الثور يهجد بعدها !! ويقولون حقوق الحيوان !!

الجلوس على الكراسي الخشب متعب جدا << مو موتاب جدا وجلسنا فترة طويلة .. لما رجعنا للباص في طريق العودة .. كل جسمي مكسّر ! وما أحس فيه !

مشينا .. وكنت أبغى أنام بالباص لكنه وقف في محطة .. اللي يبي دورة المياه (تكرمون) أو البقالة .. طبعا أنا نص صاحي متكسر ونص نايم .. قلت أروح للبقالة أشتري لي شيء  أشربه .. وأنا نازل مع الباص زلقت .. وطحت .. على العتبة الأولى ثم الثاني ثم الثالثة ثم الأرض .. لحسن الحظ إني كنت متكسر وما أحس بجسمي أصلا .. كانت قدامي بنتين يابانيات .. لحسن الحظ إنهن بعيدات شوي .. لأن طيحتي عبارة عن (إنبراش) كأحد لاعبي الحواري .. جاء السواق ركض على الصوت .. والبنات .. كلهم يقولون سلامات سلامات .. وأنا جالس أضحك !! ليه ؟ ما أدري !! قال لي السواق : هل أنت بخير ؟! << ترجمة مثالية

قلت : إيوه أصلا توني صاحي من النوم .. قعد يضحك .. ليه ؟ برضه ما أدري ! .. رحت للبقالة واشتريت عصير بطعم الزنجبيل << أما هو ذوق حلو

لما رجعت الباص لقيت السواق واقف عند الباب يقول لي : I think you need a beer ? قلت له : No, thanks اقلب وجهك !! جلست في مكاني قال لي خويي : ترا السواق اشترى بيرة لكن المشرفين عيّوا عليه لا يشربها  .. قلت : أحسن !

كملنا المشوار .. ورجعنا للمدينة .. وتلاها أحداث .. ارويها لكم لاحقا إن شاء الله .. لأني تعبت وأنا اكتب .. وما أبغى أمللكم معي .. حتى ما يصير درس (تاريخ)

نراكم على خير ,,

 

موتاب

كندا