السلام عليكم ورحمة الله وبركاته

مدري ليه .. هذا العيد - على غير الأعياد السابقة - فيه صوت “داخلي” يقول لي إني مبسوط ! ما أدري وش السبب .. لكن الحمد لله إني مبسوط .. وإن شاء الله الكل مبسوط .. وكل “عيد” وأنتم “خير”

***

لا أخفيكم سرا .. الحديث عن جدة هذه الأيام “يرفع الضغط” عندي ! لكم الله يا أهل جدة .. ما أدري كيف كان العيد هناك ؟!

يا جماعة .. تعرفون وش معنى جدة ؟! معناها : المدينة الثانية سياسيا والأولى اقتصاديا  وأكبر ميناء بحري في الشرق الأوسط وبوابة الحجاج في المملكة العربية السعودية أغنى دولة في العالم !!

إذا كان هذا حال جدة .. وش تتوقعون حال المدن المغلوب على أمرها ؟! كمدن الجنوب والشمال ؟! أذا جدة صار فيها كذا من مطر دام 4 ساعات .. أجل لو يجي مطر مدة ساعتين على قرية تموت ؟! تنمسح من الخريطة ؟! أعوذ بالله !!

من الممكن إني أستوعب إن المسؤول عديم ذمة .. أو ما يبي يشتغل بإخلاص .. أو حرامي .. أو أي سبب ثاني .. لكن يجي مسؤول ويعطينا تصريحات لا يستوعبها العاقل هذا اللي ما قدرت أستوعبه !! استغفال الناس أكثر شيء “مقرف” في عالم المسؤولين !! وكأنهم اتفقوا على “هبالتنا” !!

السؤال المهم الآن : هل المسؤول - أطال الله عمره وأصلح قلبه - لمّا يجي يصرّح ويتفوّه بخرابيطه التي لا تسمن ولا تغني من جوع , هل وهو يتكلم يتوقع إننا نصدق “الهذر” الفاضي اللي يقوله ؟! يعني مرينا الآن بسلسلة من الخرابيط : من سالفة المسؤول المسكين اللي مو قادر يكمّل بيته عشان الحديد , والثاني اللي يقول كولوا شعير بدال الرز , والأخير اللي يقول : البيوت هي اللي طلعت في وجه السيول في جدة !! الظاهر من شروط إنك تكون مسؤول إن تضحك على المواطنين وتقول كلام ما يدخل العقل !

اسمعوا المسؤول الجديد - وزير المالية - يقول : “أكد وزير المالية د.إبراهيم العساف صرف التعويضات المالية التي أمر بها خادم الحرمين الشريفين للمتضررين من سيول جدة اليوم ملمحا إلى إمكانية شمول التعويضات للمنازل والسيارات المتضررة.” ملمحا !! يعني يمكن مو أكيد !! مدري ليه جاء في بالي “عادل إمام” وأنا أقرأ التنكيت ذا !! أقصد التصريح ذا !! يمكن الوزير حبّّ ينافس عادل في مهنته ! أجل التعويضات على أيش !! ملابس ولاّ مقاضي الثلاجة !! أغلى شيء راح هي البيوت والسيارات !! عفوا .. هناك أغلى هي : الأرواح !

نرجع لجدة .. وآه يا جدة .. يقولون : إن البيوت عشوائية ؟! وش البيت العشوائي اللي عنده BMW !! أو يقولون إن البيوت هي اللي في طريق السيول والأودية مو السيول اللي جتها !! طيب من اللي أعطاهم تصاريح البناء ؟! خلونا نصدق شوي .. وننسى سالفة الطريق الجديد اللي تم افتتاحه من شهرين -تقريبا- واللي تحوّل بقدرة قادر إلى مسبح بعمق 13 مترا .. ونجي لسالفة : جامعة الملك عبدالله .. واللي كلفت 13مليار ريال !! وعلى حسب علمي إن الميزانية كانت مفتوحة لها !! بالله عليكم جامعة كنا نراهن عليها إنها راح تصير من أكبر الجامعات في العالم وبعد افتتاحها بشهرين يجيها “شوية مطر” ويطيح السقف وتمتلي الجامعة مويا !! ذكرتني بالمشب القديم حق بيتنا .. لكن الفرق إن المشب بناه عامل أفغاني وكان يهرّب مع زاوية بسيطة في الركن .. والجامعة بنتها أرامكو “شركة النفط الأولى في العالم” وهرّبت المويا وطاحت الأسقف والجامعة تسبح !! راح الأفغاني وراحت أرامكو .. وراحت أرواح بشر !!

أتوقف هنا .. عن الحديث عن المباني وشكل جدة العام .. واسمحوا لي أن أتحول لما يسمى بـ “البشر” !! ومن الآن .. أنبه أن الصور في الأسفل لا يُنصح بمشاهدتها لمن كان له قلب !

كأن المسؤولين في جدة اتفقوا على لبس البياض في زياراتهم ! ولا أدري هل ليظهروا بمظهر النظافة الساطعة ! أم لنعرف أن جدة نظيفة ! أم هو غرور !

أعضاء المجلس البلدي في جدة يزورون بحيرة المسك .. ولاحظوا إنهم لابسين أبيض في أبيض .. كأنهم في غرفة عمليات !

الحمدلله إنه فيه كم واحد لابس شماغ !! كنت أشك إنهم متفقين على الغترة !!

شوفوا الفرق في الصورة التالية وصور المسؤولين فوق !! متأكد 100% إنهم ما كانوا في نفس المكان أبدا !! ووالله لو كانوا سويا ما كانوا بهذه الحالة !! لا حول ولا قوة إلا بالله !!

أقسم بالله إن نظراته وتعبيرات وجهه تحمل الكثير من المعاني ! كان الله في عونك أخي

لكن خلونا نجي للطرف الثاني من الحكاية .. الصورة التالية هزت قلبي كثيرا .. ولا أخفيكم سرا .. شفتها بالصدفة .. وبقيت في ذهني كثيرا .. حتى والدكتور يشرح ماني قادر أنسى الصورة .. حسبي الله ونعم الوكيل !

ما ألوم والله من دمعت عينه على هذه الصورة !! كل ما يأتي الحديث عن “سيول جدة” أتذكر هذه الصورة !! رحمها الله !! مؤلم حقا ! ما أقدر أناظر للصورة كثير !

أخيرا .. الأمل بالله كبير في تعديل الحال .. والعشم في أبو متعب لأصلاح الأحوال .. والله يكون في عون إخواننا في جدة !

أتمنى حملة شعبية لجمع التبرعات لأخواننا المنكوبين في جدة .. من المشايخ والإعلام والدولة والزحمة اللي تصير كل مرة .. فهم أولى من : لبنان والعراق وفلسطين وأفغانستان وغيرهم !!

***

قفلة

” إذا ضيعت الأمانة , فانتظر الساعة “

موتاب

كاملوبس - كندا

صدقوني .. أبي رجل عظيم !